પંજાબ સરકાર આજે બજેટ કરશે રજૂ: શિક્ષણ, આરોગ્ય અને કૃષિ પર રહેશે ફોકસ

નવી દિલ્હી: આમ આદમી પાર્ટીની આગેવાની હેઠળની પંજાબ સરકાર સોમવારે તેનું પ્રથમ બજેટ રજૂ કરશે. સરકાર બજેટમાં શિક્ષણ, આરોગ્ય અને કૃષિ પર ફોકસ કરી રહી છે. આ મૂળભૂત ક્ષેત્રોમાં, નવી સરકારે અગાઉની સરકારો કરતા 15 થી 20 ટકા વધુ બજેટ ફાળવવાનું નક્કી કર્યું છે. રાજ્યના યુવાનોમાં રમતગમતને પ્રોત્સાહન આપવા સરકાર દરેક જિલ્લામાં સ્ટેડિયમ બનાવશે.

આમ આદમી પાર્ટી સોમવારે આ વર્ષનું બજેટ રજૂ કરવા જઈ રહી છે. નાણા વિભાગના અધિકારીઓના જણાવ્યા અનુસાર આ બજેટમાં નવી સરકારે શિક્ષણ, આરોગ્ય અને કૃષિ ક્ષેત્ર માટે ફાળવણીમાં નોંધપાત્ર વધારો કર્યો છે. અધિકારીઓએ છેલ્લા કેટલાક વર્ષોની સરખામણીએ આ ક્ષેત્રોમાં ફાળવણી લગભગ 15-20 ટકા રહેવાનું અનુમાન કર્યું છે.

છેલ્લા છ વર્ષના આંકડાઓ પર નજર કરીએ તો ખબર પડે છે કે બજેટમાં માત્ર 1.2 કે 2.0 ટકા ફાળવણી શિક્ષણ, આરોગ્ય અને કૃષિ ક્ષેત્રે હતી. અત્યાર સુધી શિક્ષણ ક્ષેત્રે ભંડોળની ફાળવણીની સૌથી વધુ ટકાવારી કુલ બજેટના માત્ર 1.2 ટકા હતી. જ્યારે આરોગ્ય ક્ષેત્રે માત્ર 1.25 ટકા અને કૃષિ ક્ષેત્રમાં કુલ બજેટના 2.1 ટકા હતા. આમાં ખાસ વાત એ છે કે આ મૂળભૂત સુવિધાઓવાળા વિસ્તારોમાં સૌથી વધુ ફાળવણી ચૂંટણી વર્ષના બજેટ (2021-22)માં કરવામાં આવી હતી. AAP સરકારના પ્રથમ બજેટમાં એક્સાઈઝ ડ્યુટી અને ખનિજોના વેચાણથી વધુ ટેક્સની વસૂલાત દ્વારા રાજ્યની આવક વધારવા પર પણ ધ્યાન કેન્દ્રિત કરવામાં આવશે.