કુવાડવા રોડ પર ટ્રાન્સપોર્ટના ગોડાઉનમાંથી એક લાખનો અંગ્રેજી દારૂનો જથ્થો ઝડપાયો

રાજકોટ શહેરના કુવાડવા રોડ પર આવેલ ટ્રાન્સપોર્ટના ગોડાઉનમાંથી બી ડીવીઝન પોલીસે એક લાખની કિંમતનો અંગ્રેજી દારૂનો જથ્થો ઝડપી પાડયો છે.

મળતી માહિતી મુજબ બી ડીવીઝન પીઆઇ એમ.સી.વાળાની સુચનાથી પીએસઆઇ એચ.એમ.જાડેજા અને સ્ટાફ પેટ્રોલીંગમાં હોય ત્યારે હકીકત મળી હતી કે કુવાડવા રોડ પર ગીતા પેટ્રોલ પંપની સામે આવેલ ગુજરાત ગુડ્સ સર્વિસ નામના ટ્રાન્સપોર્ટના ગોડાઉનમાં અંગ્રેજી દારૂનો જથ્થો સંતાડેલ છે. જે હકીકતના આધારે સ્ટાફે બાતમીવાળા સ્થળે પહોંચી દરોડો પાડતા અંગ્રેજી દારૂની 38 બોટલ કિં.રૂા.76000 તથા 263 ચપલા કિ.રૂ.26,300/- મળી કુલ રૂા.1,02,300/-નો મુદામાલ મળી આવતા તે કબ્જે કરવામાં આવ્યો હતો. આ દારૂનો જથ્થો રૈયા ચોકડી પાસે અક્ષર પાર્ક મેઇન રોડ પર રહેતા ભરત સિદ્ધપુરાનો હોવાનું જાણવા મળતા તેની સામે ગુનો દાખલ કરી ઝડપી પાડવા તજવીજ હાથ ધરવામાં આવી છે.

બીજા દરોડામાં દિવાનપરા મેઇન રોડ પરથી ડીસીબી સ્ટાફે અંગ્રેજી દારૂની 2 બોટલ કિં.રૂા.800 સાથે 150 ફુટ રીંગ રોડ પર યોગીરાજ સોસાયટીમાં રહેતા કાંતિલાલ વિનુભાઇ રંગગોરને ઝડપી લઇ તેની ધરપકડ કરી હતી.