સિંગલ યૂઝ પ્લાસ્ટિક પર મુકાયેલા પ્રતિબંધને પગલે રાજકોટમાં પણ ચેકિંગ શરૂ કરી દેવાયું છે. આજે રાજકોટ મહાનગરપાલિકાની ટીમે પ્લાસ્ટિકના વેપારીઓને ત્યાં દરોડા પાડીને ચેકિંગ હાથ ધર્યું હતું જેમાંથી પ્લાસ્ટિકના કપ, ગ્લાસ સહિતની વસ્તુઓનો 26.16 કિલો જથ્થો જપ્ત કરી આકરી કાર્યવાહી કરી હતી. ચેકિંગ દરમિયાન 9 કિલો પ્લાસ્ટિકના કપ, 8.66 કિલો ગ્લાસ તેમજ 8.480 કિલો પ્લાસ્ટિકના ઝબલાનો જથ્થો ટીમને હાથ લાગ્યો હતો. તેમજ 8.5 કિલો 75 માઈક્રોનથી ઓછી જડાઈ ધરાવતી પ્લાસ્ટિકની થેલીઓ જપ્ત કરવામાં આવી હતી.ડિસ્ટ્રિબ્યુટર ઉપરાંત રીટેઇલર અન્ય ધંધાર્થીઓને ત્યાં પણ ચેકિંગ કાર્યવાહી ચાલુ રખાઇ છે.

પ્લાસ્ટિકની વસ્તુઓનો જથ્થો જપ્ત કર્યો
રિટેઇલરો–ખાણીપીણીના ધંધાર્થીઓને, ફેરિયાઓ કે ચાની લારીઓ કે હોટેલ પર સપ્લાય થતાં પ્લાસ્ટિક કપ, ગ્લાસ, સ્પૂન, ડીસ આવી વસ્તુઓના વેપારીઓને ત્યાં જ શુક્રવારે સવારથી ટીમો દ્વારા ચેકિંગ હાથ ધરાયું હતું.કેન્દ્ર સરકારના આદેશને પગલે દરેક રાજ્ય અને શહેરોમાં સિંગલ યૂઝ પ્લાસ્ટિક ઉપર પ્રતિબંધના નિયમનો અમલ શરૂ થયો છે જેના પગલે રાજકોટ શહેરમાં પણ શુક્રવારે કોર્પોરેશનની ટીમે શહેરના જુદા-જુદા પ્લાસ્ટિકની વસ્તુનું વેચાણ કરતા વેપારીઓને ત્યાં સઘન ચેકિંગ કર્યું હતું અને પ્રતિબંધિત પ્લાસ્ટિકની વસ્તુઓનો જથ્થો જપ્ત કર્યો હતો.

રૂ.9.83 લાખના ઓઇલનો જથ્થો સીઝ
આ સાથે આજે ફૂડ વિભાગ દ્વારા જૂના માર્કેટિંગ યાર્ડ શોપ નં જી-6 પાસે, રાજકોટ મુકામે આવેલ ’સોનિયા ટ્રેડર્સ’ નામની પેઢીમાંથી વી-લાઇટ રીફાઇન્ડ સનફલાવર ઓઇલ 15 કિલોના ટીનનો નમૂનો ફેઈલ થતા અધિક કલેક્ટર દ્વારા રૂ. 50,000/- નો દંડનો હુકમ કરવામાં આવ્યો છે અને રૂ.9.83 લાખના 5923 કિ.ગ્રા ઓઇલનો જથ્થો સીઝ કરવામાં આવ્યો હતો.

રૂ.7.79 લાખના હર્બલ જ્યુસનો નાશ કરાયો
આ ઉપરાંત ફૂડ વિભાગ દ્વારા મારુતિ ઇન્ડ. એરિયા ચારભુજા માર્બલવાળી શેરી, ગોંડલ રોડ, જકાતનાકા પાસે, રાજકોટ મુકામે આવેલ 'પ્યોર ફૂડ્સ' નામની પેઢીમાંથી હર્બલ જયુસની બે પ્રોડક્ટનો નમૂનો ફેઈલ થતા ફેઈલ થતા અધિક કલેક્ટર દ્વારા કુલ રૂ.30,000/- નો દંડનો હુકમ કરવામાં આવ્યો છે. અને બન્ને પ્રોડક્ટની 1311 બોટલ જપ્ત કરી કુલ રૂ.7.79 લાખના જથ્થાનો નાશ કરવામાં આવ્યો હતો.