શહેર ક્રાઇમ બ્રાંચના કીરતસિંહ ઝાલા, કુલદીપસિંહ જાડેજા અને પ્રદીપસિંહ જાડેજાએ બાતમીના આધારે આજીડેમ ચોકડી પાસેથી જયેશ પટેલ ઉર્ફે વાલજી મકવાણા અને રાજુભાઇ ઉર્ફે ઇનાયત શેખની કરી ધરપકડ : બંન્ને પાસેથી રૂા.7.60 લાખની રોકડ કબ્જે કરાઇ : છેતરપીંડી આચરનારા ધર્મેન્દ્ર ઉર્ફે હસુભાઇ અને હિતેશ મકવાણાની શોધખોળ

શહેરમાં ગોંડલ રોડ પર આવેલી હોટલ ક્રિષ્ના પાર્કમાં રાજસ્થાની સોની વેપારીને બજાર ભાવ કરતા 20% સસ્તુ સોનુ આપવાની લાલચ આપી સોદો કરવા માટે બોલાવ્યા બાદ વેપારી પાસેથી એડવાન્સ પેટે રૂા.20 લાખ લઇ વેપારીને ચોટીલા અને અમદાવાદ ખાતે લઇ ગયા પછી તેની નજર ચુકવી ચાર શખ્સો રોકડ લઇ ભાગી જતા રાજકોટ તાલુકા પોલીસ મથકમાં ફરીયાદ નોંધાવવામાં આવી હતી. જે ગુનાના બે આરોપીની આજીડેમ ચોકડી નજીકથી ક્રાઇમ બ્રાંચની ટીમે ધરપકડ કરી રૂા.7.60 લાખની રોકડ કબ્જે કરી હતી.

મળતી માહિતી મુજબ રાજસ્થાનના જોધપુરમાં રહેતા જનકભાઇ સોનીને બે દિવસ પહેલા કચ્છ પંથકના જયેશ પટેલ, રાજુભાઇ, ધર્મેન્દ્ર અને હિતેશ નામના શખ્સોેએ સસ્તુ સોનુ આપવાની લાલચ આપી સોનુ ખરીદવા રાજકોટ ખાતે બોલાવતા વેપારી જનકભાઇ રાજકોટ આવ્યા હતા. રેલ્વે સ્ટેશને ઉતર્યા બાદ ઠગ ટોળકી તેને ગોંડલ રોડ પર આવેલી હોટલ ક્રિષ્ના પાર્કમાં લઇ ગયા હતા. જ્યાં સોનાનો 20% ઓછા ભાવે સોદો કર્યા બાદ તેઓને માલ અમદાવાદમાં મળશે તેવું કહી પોતાની કારમાં પ્રથમ ચોટીલા અને ત્યાંથી બીજી કારમાં અમદાવાદ લઇ જવામાં આવ્યા હતા. અમદાવાદ ખાતે ગીતા મંદિર પાસે એક ચાની હોટલે બધા ભેગા થયા બાદ જનકભાઇ પાસેથી સોદાના રૂા.20 લાખ એડવાન્સમાં લેવામાં આવ્યા હતા. જે રકમના બદલામાં સોનુ આપવાની રાહ જોઇ ચારેય શખ્સો વેપારી સાથે બેઠા હોય તે દરમ્યાન કોઇક ને કોઇક બહાનું કરી ચારેય શખ્સો એક બાદ એક વેપારીની નજર ચુકવી ત્યાંથી ભાગી ગયા હતા. દરમ્યાન વેપારીને પોતાની સાથે છેતરપીંડી થયાનું માલુમ પડતા તેઓએ રાજકોટ આવી તાલુકા પોલીસ મથકમાં આ અંગેની ફરીયાદ નોંધાવી હતી. જેથી પોલીસે ચારેય શખ્સો સામે ગુનો દાખલ કરી શોધખોળ હાથ ધરી હતી. દરમ્યાન ક્રાઇમ બ્રાંચ પીઆઇ જે.વી.ધોળા અને પીઆઇ વાય.બી.જાડેજાની સુચનાથી પીએસઆઇ એમ.જે.હુણ અને સ્ટાફ પેટ્રોલીંગમાં હોય ત્યારે મળેલી હકીકતના આધારે આજીડેમ ચોકડી પાસેથી છેતરપીંડીના ગુનામાં જયેશ પટેલ ઉર્ફે વાલજી ધનજી મકવાણા (ઉ.54, રહે.પાળીયાદ) તથા રાજુભાઇ ઉર્ફે ઇનાયત નાસીર શેખ (ઉ.26, રહે.કોઠારીયા સોલવન્ટ)ની ધરપકડ કરી તેમની પાસેથી રૂા.7.60 લાખ રોકડ કબ્જે કરી હતી. આ બંન્ને આરોપીઓની ધરપકડ કરી છેતરપીંડીના ગુનામાં મેળવેલી કુલ રૂા.20 લાખની રકમમાંથી રૂા.4.50 લાખ વાલજીના, રૂા.5 લાખ ઇનાયતના, રૂા.2.50 લાખ હિતેશના અને રૂા.8 લાખ હસુભાઇના ભાગ પાડવામાં આવ્યા હતા. રૂપિયા મળી ગયા બાદ ચારેય શખ્સો અલગ અલગ દિશામાં ભાગી ગયા હતા. જેમાંથી રાજકોટના આજીડેમ ચોકડી ખાતે વાલજી મકવાણા અને ઇનાયત શેખ આવ્યા હોવાનું જાણવા મળત બાતમીના આધારે તેની ધરપકડ કરવામાં આવી હતી.