વેબસિરીઝ ‘આર્યા-3’ ની સુસ્મિતાની જાહેરાત: ટુંક સમયમાં દર્શકોને જોવા મળશે

ભૂતપૂર્વ મિસ યુનિવર્સ અને બોલીવુડની હીરોઈન સુસ્મિતા સેન તેની વેબ સી રીઝ ‘આર્યા’થી દર્શકોમાં લોકપ્રિય બની છે. હવે તેની, સુપરહિટ વેબ સીરીઝ ‘આર્યા’ની ત્રીજી સીઝન ટુંક સમયમાં દર્શકોને જોવા મળશે. આ સીરીઝના ડાયરેકટર રામ માધવાનીએ પોતાના ઈન્સ્ટાગ્રામ પેજ પર ‘આર્યા’ની ત્રીજી સીઝનની જાહેરાત કરી છે.

‘આર્યા’ વેબસીરીઝ મૂળ રૂપે ડચ સીરીઝ ‘પિનોઝા’ની રિમેક છે. આ સીરીઝની પહેલી સીઝનથી જ સુસ્મીતા સેને આર્યાની ભૂમિકા ભજવી છે, જેમાં તેનો સુખી પરિવાર દર્શાવવામાં આવ્યો હતો. તેની પહેલી સીઝનમાં જ તેના પતિની હત્યા કરી નાંખવામાં આવે છે. બીજી સીઝનમાં આર્યાની જર્ની દર્શાવાઈ છે, જેમાં તે એક બિલકુલ અજાણ્યા માહોલમાં ફસાઈ જાય છે. જેમાં તેના ત્રણ બાળકોની સાથે સાથે માનો સંઘર્ષ પણ દર્શાવાયો છે.

ઉલ્લેખનીય છે કે છેલ્લા બે વર્ષમાં ‘આર્યા’ની બોલબાલા રહી છે, જેથી હવે આ સીરીઝના ડાયરેકટર રામ માધવાનીએ ‘આર્યા’ની ત્રીજી સીઝનની જવાબદારી ઉઠાવી છે. સુસ્મીતા સેને ‘આર્યા-3’ ને લઈને ઈન્સ્ટાગ્રામમાં પોસ્ટ શેર કરી લખ્યું છે- સિંહણ નવી સફર માટે તૈયાર છે.