એશિયા કપમાં 28 ઓગસ્ટે ભારતનો પાકિસ્તાન સામે મુકાબલો, વર્લ્ડ કપમાં મળેલી હારનો બદલો લેવાની તક

એશિયા કપ 2022માં ભારતનો મુકાબલો પાકિસ્તાન સામે થશે. આ મેચ 28 ઓગસ્ટે થઈ શકે છે. ટીમ ઈન્ડિયા પાસે આ મેચમાં પાકિસ્તાનને હરાવીને 2021 T20 વર્લ્ડ કપમાં મળેલી હારનો બદલો લેવાની તક હશે. એશિયા કપ 2022 ની યજમાની શ્રીલંકાએ કરી છે. અગાઉ એવી અટકળો હતી કે શ્રીલંકામાં ચાલી રહેલા આર્થિક સંકટને કારણે આ ટૂર્નામેન્ટ UAEમાં યોજવામાં આવી શકે છે, પરંતુ હવે આ ટૂર્નામેન્ટ નિર્ધારિત સમય મુજબ શ્રીલંકામાં જ રમાશે.

મીડિયા રિપોર્ટ્સ અનુસાર, શ્રીલંકા ક્રિકેટના સીઈઓ એશ્લે ડીસિલ્વાએ આ માટે એશિયન ક્રિકેટ કાઉન્સિલને પણ મનાવી લીધા છે. આ વખતે એશિયા કપ T20 ફોર્મેટમાં રમાશે, કારણ કે આ પછી T20 વર્લ્ડ કપનું પણ આયોજન થવાનું છે. ભારત આ ટૂર્નામેન્ટમાં પોતાનું ટાઇટલ બચાવવા જશે. મુખ્ય રાઉન્ડની મેચો 27 ઓગસ્ટથી શરૂ થશે. તે પહેલા ક્વોલિફાઈંગ રાઉન્ડ રમાશે.

2021 T20 વર્લ્ડ કપમાં ભારતની પ્રથમ મેચ પાકિસ્તાન સામે હતી અને આ મેચમાં ટીમ ઈન્ડિયાને 10 વિકેટથી હારનો સામનો કરવો પડ્યો હતો. આ પ્રથમ વખત હતો જ્યારે ટીમ ઈન્ડિયા વર્લ્ડ કપમાં પાકિસ્તાન સામે હારી ગઈ હતી. આ પહેલા પાકિસ્તાન ક્યારેય ભારતને ODI કે T20 વર્લ્ડ કપમાં હરાવી શક્યું નથી. 2021 T20 વર્લ્ડ કપમાં પાકિસ્તાન અને ન્યુઝીલેન્ડ સામે હાર્યા બાદ ભારત લીગ સ્ટેજમાંથી બહાર ફેંકાઈ ગયું હતું. હવે ટીમ ઈન્ડિયા પાસે આ હારનો બદલો લેવાની તક છે.