ભારતીય ક્રિકેટને મોટુ સન્માન: ઇંગ્લેન્ડના ક્રિકેટ સ્ટેડીયમને ‘સુનિલ ગાવસ્કર’નું નામ મળશે

ભારતીય ક્રિકેટમાં લીટલ માસ્ટર તરીકે જાણીતા અને પૂર્વ કપ્તાન સુનિલ ગાવસ્કરને ઇંગ્લેન્ડમાં મોટુ સન્માન મળ્યું છે. મહાન બેટ્સમેન એવા સુનિલ ગાવસ્કરના નામ પર ઇંગ્લેન્ડના સ્ટેડીયમને નામ આપવામાં આવ્યું છે. આજે 23 જુલાઈના રોજ લીસેસ્ટર ક્રિકેટ ગ્રાઉન્ડનું નામ સુનિલ ગાવસ્કર રહેશે. ઇંગ્લેન્ડમાં કોઇપણ સ્ટેડીયમને ભારતીય ક્રિકેટરનું નામ આપવામાં આવ્યું હોય તેવું પ્રથમ વખત બન્યું છે.

આ પૂર્વે અમેરિકામાં કેન્ટકીમાં એક મેદાનને સુનિલ ગાવસ્કર ફીલ્ડ નામ આપવામાં આવ્યું હતું. આ જ રીતે તાન્ઝાનિયામાં ઝાંઝીબારમાં સુનિલ ગાવસ્કર ક્રિકેટ સ્ટેડીયમ તૈયાર થઇ રહ્યું છે. હવે પ્રથમ વખત ઇંગ્લેન્ડમાં આ સન્માન મળ્યું છે. ગાવસ્કરનું નામ આપવા ભારતીય મૂળના સાંસદ કીથ વાઝે અભિયાન ચલાવ્યું હતું. આ સન્માન વિશે ગાવસ્કરે કહ્યું કે પોતે ખૂબ ખુશ છે.લીસેસ્ટરમાં રમતગમતનું ઘણું મહત્વ છે.

અને મારા માટે આ ઘણું મોટુ સન્માન છે. અત્રે ઉલ્લેખનીય છે કે લીટલ માસ્ટર તરીકે જાણીતા સુનિલ ગાવસ્કર ટેસ્ટ ક્રિકેટમાં 10,000 રન બનાવનારા પ્રથમ ભારતીય ખેલાડી બન્યા હતા અને તેમના નામે અનેકવિધ રેકોર્ડ હતા. જે પછી સચિન તેંડુલકરે તોડ્યા હતા. ગાવસ્કરે ક્રિકેટ કારકિર્દીમાં 34 સદી ફટકારી હતી અને 10,122 રન બનાવ્યા હતા.